Бүгүн, ол эбэтэр ыам ыйын 9 күнүгэр, Өспөх нэһилиэгин олохтоохторо, Улуу Кыайыы 79 сылын бэлиэтээтибит. Нэһилиэк олохтоохторо бу күҥҥэ, Улуу Кыайыыны уһансыбыт өбүгэлэрин чиэстээн- бочуоттаан, кинилэр сырдык мэтириэттэрин өрө уунан, бүтүн Арассыйатааҕы «Өлбөт-сүппэт полк» акцияҕа кыттыһан, парадтаан хаамтыбыт. Саҥа тутуллубут Кыайыыбыт болуоссатыгар Өспөх нэһилиэгиттэн аттаммыт 85 буойун саллааттарбытыгар, «Бары күүһү- фроҥҥа»- диэн лозуннаах утуйар ууларын умнан туран тыылга үлэлээбит бар дьоммутугар, уодаһыннаах уот сэрии кэмин оҕолоругар, тулаайахтарыгар, бука барыларыгар сүгүрүйэммит, махтанаммыт өйдөбүнньүк гирлянданы уурдубут, уостан түспэт ырыалардаах, күргүөмүнэн хоһоонноох миитин ыыттыбыт, уонна биир сомоҕо буолан, Кыайыы оһуохайынан миитиммитин түмүктээтибит. Миитин кэннэ, сыллата үгэс буолбут «Кыайыы эстафетата» ыытылынна. Бүгүҥҥү тэрээһиммит кыттыылаахтарыгар, тэрийэр бөлөххө, бука барыгытыгар барҕа махтал буолуохтун!
