2025 сыл, бэс ыйын 23 күнүгэр, Улуу Кыайыы өрөгөйдөөх 80 сылын көрсө, Арассыыйаҕа аҕа дойдуну көмүскээччилэр, Сахабыт сиригэр Ийэ дойдуну көмүскээччилэр, Уус Алдан улууһугар Тыа хаһаайыстыбатын сылларын чэрчитинэн Өспөх нэһилиэгин маанылаах туонатыгар арҕаһыттан тэһииннээх аһыныгас санаалаах Айыы хаан аймахтара, көхсүттэн көнтөстөөх көмүскэс санаалаах күн өркөн улууһун дьоно, өбүгэттэн утумнаабыт үгэспитин, омук быһыытынан уратыбытын көрдөрөр, Айылҕалыын алтыһар, сиэри-туому сөргүтэр уйгу-тунах ыһыаҕа бэрт киэҥ далааһыннаахтык, түмсүүлээхтик ыытылынна! Быйылгы ыһыахха нэһилиэк олохтоохторо Аҕа дойду улуу сэриитигэр тигинээн үлэлээбит холкуостарын, туруу үлэһит дьонун чиэстээн, үйэтититэн 3 хамаандаҕа арахсан, олус сэргэхтик күрэхтэстилэр, ол саҕанааҕы кэми көрдөрөр, тыыны биэрэр, холкуостарга анаан саҥалыы түһүлгэ оҥордулар, холкуостарынан сэлэлии хаамтылар, холкуос туһунан билиһиннэрэр, дьүһүйүү туруордулар, эҕэрдэ ырыаларын ыһыахтыыр түһүлгэҕэ дьиэрэттилэр. Маны таһынан ыраахтан-чугастан кэлбит ыалдьыттарга анаан амтаннаах алаадьынан, кыынньар кымыһынан көрсүү тэриллиннэ, Омоҕой Баай саҕаттан олохтоммут оһуокай оройуттан тутуллубута, тойук дуорайбыта, үҥкүү үксээбитэ, ыллам ырыа ылламмыта- түһүлгэҕэ кэнсиэр бэрт сэргэхтик ааспыта! Амтаннаах аһы амсайар маанылаах сандалы кэнниттэн, улууска Тыа хаһаайыстыбатын сылын чэрчитинэн, дьахталларга «Мааны Маҥааччыйа» күрэх ыытыллыбыта. Ол кэннэ о5олорго саха төрүт оонньуулара «Алаас оҕолоро», эр дьоҥҥо үгэскэ кубулуйбут «Өспөх Тойон ооньуулара» күрэхтэр олус сэргэхтик ыытыллыбыттара. Даҕатан эттэххэ, ыһыахпытын тэрийэргэ олус элбэх киһи күүс — көмө буолбута. Ол курдук, тэрээһиммит сүрүн спонсордарыгар, өссө төгүл сүһүөхтээх бэйэбит сүгүрүйэн туран ис сүрэхтэн махталбытын биллэрэбит, ол курдук: Румянцев Василий Афанасьевич сыдьааннарыгар, Румянцев Петр Михайлович сыдьааннарыгар, Горохов Николай Федотович сыдьааннарыгар, сэттэ ини-бии Румянцевтар сыдьааннарыгар, Сивцев Афанасий Алексеевич, Румянцева Анна Прокопьевна сыдьааннарыгар, Свешников Иван Петрович 1 сыдьааннарыгар, Егоров Артамон Максимович сыдьааннарыгар, Свешникова Аксинья Даниловна сыдьааннарыгар, Румянцев Семен Яковлевич, Захарова Анисия Дмитриевна сыдьааннарыгар, Сивцев Иван Алексеевич сыдьааннарыгар, эдэр урбаанньыт ыалга Федотова Ирина Юрьевна уонна Федотов Жиган Владимировичка, ЫБСЛКС Киин Комитетын «Молодой гвардеец пятилетки» бэлиэ хаһаайыттарыгар, «Оптимист» маҕаһыыҥҥа, чуолаан Геннадий Михайлович Жирковка, «Дэлэй» маҕаһыыҥҥа, чуолаан Егоров Тимофей Тимофеевичка! Уйгу тунах ыһыахпытыгар көхтөөх кыттыыны ылбыт нэһилиэкпит дьонугар, ыраахтан-чугастан кэлбит маанылаах ыалдьыттарбытыгар, сүбэ-ама буолбут дьоҥҥо, туох баар кыттыгастаахтарга эмиэ махтал мааныта буоллун! Күөх сайыммыт барахсан элбэх кэрэ түгэни, үгүс үтүөнү, дьолу бэлэхтээтин!
